Advertisements
Advertisements

Guddoomiyaha cusub ee G/Banaadir Guddoomiyihii xilka laga qaaday Taabid oo kulmay

Isnin, Jan 22, 2018, (HNN) Gudoomiyaha cusub ee gobolka Banaadir oo kulan xasaasi ah la qaatay Gudoomiyihii hore ee gobolka Banaadir Taabid Cabdi iyo masuuliyiin ka tirsan dowlada Soomaaliya.

Xubno isugu jiray Wasiiro, Taliyeyaal, iyo Guddoomiyaha cusub ee Gobolka Banaadir Eng. C/raxmaan Yariisow ayaa gurigiisa ku booqday Guddoomiye Taabid Cabdi, waxaana dhex maray kulan uu albaabada u xirnaa.

Kulankan ayaa ahaa mid lagu soo afjarayay xiisada, isla markaana labada dhinac ay uga xaajoon lahaayeen ka bixida xilliga kala guurka ee uu galay Gobolka Banaadir.

Guddoomiyaha cusub iyo Guddoomiyaha xilka laga qaaday ayaa isku afgartay in munaasabadda xil wareejinta ay u dhacdo si habsami leh.

Taabid Cabdi Maxamed ayaa dib ugu laabanayo Xarunta Gobolka Banaadir, si uu u diyaariyo xil wareejinta, iyadoo lagu wado inuu magacaabo Guddi Xil wareejin oo dhankiisa ka socda.

Sidoo kale Guddoomiyaha cusub Eng. Yariisow ayaa isna soo magacaabaya Guddi xil wareejin oo diyaariya xaflada xil wareejinta iyo habsami u socodka howlaha xilliga kala guurka.

Ugu dambeyn waxaa xubnaha kulanka qeyb ka mid ahaa Wasiirka Amniga Maxamed Abuukar Islow, Wasiirka Boostada Eng. Canshuur, Wasiir kuxigeenka Dekedaha Cusmaan daalo, Xildhibaan Mustaf Dhuxulow iyo Taliyeyaasha ciidamada qalabka sida iyo masuliyiin kale oo ka tirsan xukumada dowlada Soomaaliya.

 

 


Fikradaha Akhristayaasha (0)